Ang Aking Pag-ibig: Tulang Pandamdamin Mula sa England

-

 ANG AKING PAG-IBIG

Tulang Pandamdamin Mula sa England

Magandang araw,  mga mag-aaral. Lubos ang aking galak narito na naman kayo sa aking blog  upang makapulot ng bagong aral. Binabati kita sa masipag mong pag-aaral. 
    
    Ang blog na ito ay naglalaman ng akdang “Ang Aking Pag-ibig” mula sa Italy na isinalin sa Filipino ni Alfonso O. Santiago. Bahagi rin ng blog na ito ay ang pagtatalakay sa kahalagahan ng angkop at mabisang paggamit ng matatalinghagang pananalita sa pag-unawa sa tula na tatalakayin gayon din ang paraan ng paglalarawan nito.

ALAM MO BA?
    Ang TULA ay isang anyo ng sining o panitikan na naglalayong maipahayag ang damdamin sa malayang pagsusulat. Mababasa sa mga tula ang mga kaisipang naglalarawan ng kagandahan, kariktan at kadakilaan. 
    May apat na pangkalahatang uri ang tula: tulang pandamdamin o tulang liriko, tulang pasalaysay, tulang padula at patnigan. 
    Ang SONETO na iyong binasa ay nasa anyo ng tulang pandamdamin o tulang liriko. Ito ay may tiyak na sukat at tugma na kailangang isaalang-alang. Binubuo ito ng labing-apat na taludtod at sampung pantig sa bawat taludtod. 
TUKLASIN NATIN
    Tunghayan natin ang tulang liriko ng tanyag na manunulat na si Elizabeth Barret Browning ng England (hango sa Sonnet 43).

"Ang Aking Pag-ibig"

How Do I Love Thee-Sonnet XLIII
Ni Elizabeth Barret Browning
Isinalin sa Filipino ni Alfonso O. Santiago
https://www.shutterstock.com/search/couple+sketch

Ibig mong mabatid, ibig mong malaman 
Kung paano kita pinakamamahal? 
Tuturan kong lahat ang mga paraan, 
Iisa-isahin, ikaw ang bumilang. 

Iniibig kita nang buong taimtim, 
Sa tayog at saklaw ay walang kahambing, 
Lipad ng kaluluwang ibig na marating 
Ang dulo ng hindi maubos-isipin. 

Yaring pag-ibig ko’y katugon, kabagay 
Ng kailangan mong kaliit-liitan, 
Laging nakahandang pag-utus-utusan, 
Maging sa liwanag, maging sa karimlan. 

Kasinlaya ito ng mga lalaking 
Dahil sa katwira’y hindi paaapi, 
Kasingwagas ito ng mga bayaning
Marunong umingos sa mga papuri. 

Pag-ibig ko’y isang matinding damdamin, 
Tulad ng lumbay kong di makayang bathin 
Noong ako’y isang musmos pa sa turing 
Na ang pananalig ay di masusupil. 

Yaring pag-ibig ko, ang nakakabagay 
Ay ang pag-ibig ko sa maraming banal, 
Na nang mangawala ay parang nanamlay 
Sa pagkabigo ko at panghihinayang. 

Yaring pag-ibig ko ay siyang lahat na, 
Ngiti, luha, buhay at aking hininga! 
At kung sa Diyos naman na ipagtalaga 
Malibing ma’y lalong iibigin kita.
SURIIN NATIN
ELEMENTO NG TULA
        1. Sukat 
    • Ito ay bilang ng pantig sa bawat taludtod. 
        2. Tugma 
    • Ito ang pagkakahawig o pagkakapareho ng tunog ng huling salita sa bawat saknong.
        3. Tono
    • Ito naman ang namamayaning damdamin sa loob ng tula.
        4. Simbolismo
    • Ito ay mga makabuluhang salita na nagpapasidhi sa guniguni ng mga mambabasa. 
        5. Talinghaga
    • Ito’y matatayog na diwang ipinahihiwatig ng makata.
    6. Paksa
    • Ito ang tema ng tula tumutukoy kung tungkol saan ang isang tula o kaisipan ng buong tula. Ito ay maaring tungkol sa pag-ibig, nasyonalismo, kabayanihan, kalayaan, katarungan , pagmamahal sa kalikasan, Diyos, bayan, sa kapwa at marami pang iba.
    7. Kariktan 
    • Ang kariktan ang tumutukoy sa paggamit ng matatalinghagang salita, mga salitang may malalalim na ibig ipakahulugan at mga tayutay tulad ng pagwawangis, pagtutulad at iba pa.
    • Ang matatalinghagang pahayag ay may malalim o hindi tiyak na kahulugan. Sinasalamin ng paggamit nito ang kagandahan at pagkamalikhain ng isang tula. Isa sa madalas na gamiting talinghaga ang pagpapahayag nang patayutay o tayutay. 
    • Ang TAYUTAY ay nagbibigay ng mabisang kahulugan upang maging maganda at makulay at kaakit-akit ang pagpapahayag sa isang tula. Tamang gamit ng mga salita at pagkakabuo ng mga pangungusap na sasabayan ng matatalinghagang pahayag na magpapaganda sa isang tula. 
                MGA URI NG TAYUTAY
                1. Pagtutulad o simile
      • Ito ay isang paghahambing sa dalawang magkaibang tao, bagay, pangyayari atbp. Gumagamit ang pagtutulad ng mga salitang tulad ng, katulad ng, parang, kawangis ng, anaki’y, animo, at iba pa. 
                2. Pagwawangis o metapora
      • Ito ay katulad ng pagtutulad, naghahambing ng dalawang bagay ngunit tuwiran ang ginagawang paghahambing. 
                3. Pagmamalabis o hyperbole
      • Pagpapalabis sa normal upang bigyan ng kaigtingan ang nais ipahayag. 
                4. Pagtatao o personipikasyon
      • Paglilipat ng katangian ng isang tao sa mga walang buhay.

ISAISIP

MGA DAPAT TANDAAN SA PAKSANG ITO

1. Ang tula ay isang anyo ng sining o panitikan na naglalayong maipahayag ang damdamin sa malayang pagsusulat.

2. May apat na pangkalahatang uri ang tula: tulang pandamdamin o tulang liriko, tulang pasalaysay, tulang padula at patnigan.

3. May apat na uri ng tayutay ang tinalakay sa blog na ito; pagtutulad o simile, pagwawangis o metapora, pagmamalabis o hyperbole at pagtatao o personipikasyon.

4. Sa pagsulat ng tula ay dapat magsanib ang gramatika at retorika upang maging maganda ang isang katha.

    Binabati kita! Sa wakas ay natapos mo pag-aral ang paksang tinalakay sa araw na ito. Bukas ay bagong kaalaman na naman ang matututuhan mo. Muli kong aasahan ang iyong masipag na pag-aaral.


MGA SANGGUNIAN
  • https://www.coursehero.com/file/78209558/Fil10-Q2-Mod3-Ang-Aking-Pagibig-v3pdf/
  • https://youtu.be/mvHRwfPuBA8



Comments

Post a Comment

Popular posts from this blog

Dula: Sintahang Romeo at Juliet

-
Image
  DULA MULA SA ENGLAND Panitikan: "Sintahang Romeo at Juliet "      Kumusta mag-aaral? Binabati kita’t naging kawili-wili para sayo ang pagkatuto sa aking ibang blog na binuo. Ngayon, isa na namang kaalaman ang tiyak kong kalulugdan mong tutuklasin dahil sa mga kawili-wiling paksang nakapaloob sa blog na ito.      Ito ay tatalakayin natin ang "Uri ng Dula Ayon sa Anyo at Elemento ng Dulang Pantanghalan"  at alamin ang isa sa mga halimbawa ng dula ang  "Sintahang Romeo at Juliet" na nagmula pa sa bansang Englater a . ALAM MO BA?      Ang DULA ay hango sa salitang Griyego na “drama” na nangangahulugang gawain o kilos. A yon kay Aristotle ay isang sining ng panggagaya at pag-iimita sa kalikasan ng buhay. Ipinapakita dito ang realidad ng buhay ng tao gayundin ang kanyang mga iniisip, ikinikilos, at isinasaad. Ito ay isinusulat at itinatanghal upang magsilbing salamin ng buhay na naglalayong makaaliw, makapagturo, o makapagb...
Read more

Mitolohiya ng Iceland

-
Image
MITOLOHIYA NG ICELAND  Panitikan: " Sina Thor at Loki sa Lupain ng mga Higante"   ALAM MO BA?     Ang MITOLOHIYA  ay isang natatanging kuwento na kadalasang tumatalakay sa kultura, sa mga diyos o bathala at ang kanilang karanasan sa pakikisalamuha sa mga tao. Maaaring nagsimula ang mitolohiya mula nang magtanong ang mga tao tungkol sa pagkakalikha ng mundo at ano ang kanilang tungkulin dito. Mahalaga ang mitolohiya dahil nakapaloob dito ang mga sinaunang paniniwalang panrelihiyon at kultura ng isang bansa at kapupulutan din ito ng aral.      Ang blog na ito ay tumatalakay patungkol sa sa mitolohiya ng bansang Iceland. Ang Iceland ay kabilang sa mga lahing Nordic na matatagpuan sa Hilagang Europa. Ang mga Eskandinaba ay mga lahi na nagsasalita ng Germanic Languages (Norse) . Kabilang dito ang Sweden, Norway, Denmark, Finland, Greenland, Faroe Island at Iceland. Pinaniniwalaan na ang unang mga nanirahan sa Iceland noong ika-9 na siglo ay ...
Read more